ایف بی آر کا دسمبر میں ایک کھرب سے زائد محصولات جمع کرنے کا ریکارڈ قائم

ایف بی آر نے ایک ماہ میں ایک کھرب روپے سے زائد کے محصولات جمع کرنے کا ریکارڈ قائم کر دیا۔ اسلام آباد سے ایف بی آر کے مطابق دسمبر 2023 کے دوران 1021 ارب روپے کے محصولات جمع کیے گئے۔ 

ایف بی آر کے مطابق دسمبر میں جاری 38 ارب روپے کے ریفنڈز ایڈجسٹ کرنے کے بعد خالص محصولات کی وصولی 984 ارب روپے رہی۔ رواں مالی سال کی پہلی ششماہی کے ہدف 4425 ارب روپے کے مقابلے میں 4468 ارب روپے جمع کیے گئے۔

ایف بی آر کے مطابق رواں مالی سال کی ششماہی کے دوران 4468 ارب روپے کے ریکارڈ محصولات جمع کیے گئے۔

ایف بی آر کے مطابق براہ راست اور بالواسطہ ٹیکسوں کے تناسب میں بھی تبدیلی دیکھنے میں آئی۔ مالی سال کی پہلی ششماہی میں براہ راست ٹیکسوں کاحصہ بڑھ کر 49 فیصد ہوچکا ہے۔

ایف بی آر کے مطابق صرف دسمبر کے مہینے میں براہ راست ٹیکسوں کا حصہ 59 فیصد ریکارڈ کیا گیا۔

ایف بی آر کے مطابق رواں مالی سال کی پہلی ششماہی کے دوران براہ راست ٹیکسز کی مد میں 41 فیصد اضافہ ہوا۔

چیئرمین ایف بی آر کے مطابق ٹیکس دہندگان کے مسلسل تعاون اور درست ڈیکلریشنز کے بغیر یہ ہدف حاصل نہیں کیا جا سکتا تھا۔