بادشاہ چارلس کینسر کے علاج میں پیش رفت کے بعد اگلے ہفتے دوبارہ عوامی مصروفیات کا آغاز کریں گے

یہ ایک محتاط امید بھرا پیغام ہے مگر بادشاہ کا علاج، جو فروری میں شروع ہوا تھا، اب بھی جاری ہے اور اس کے اختتام کی کوئی تاریخ نہیں دی گئی ہے۔

بکنگھم پیلس نے جمعہ کو جاری کردہ ایک بیان میں بادشاہ کی عوامی مصروفیات اور ان کی حالت کے بارے میں تفصیلات جاری کی ہیں۔

پیلس کے مطابق یہ کہنا قبل از وقت ہے کہ ’ان کا علاج کب تک جاری رہے گا۔‘

پیلس سے جاری بیان میں مزید کہا گیا ہے کہ ڈاکٹروں کو اب تک ہونے والی پیشرفت سے بہت حوصلہ ملا ہے اور وہ بادشاہ کی مسلسل صحت یابی کے بارے میں بہتری کی امید رکھتے ہیں۔

بادشہ کو لاحق کینسر کی قسم کا انکشاف نہیں کیا گیا لیکن ان کی میڈیکل ٹیم ’اب تک ہونے والی پیشرفت سے کافی حد تک مطمئن ہے اور بادشاہ اب عوامی سطح پر متعدد فرائض دوبارہ شروع کرنے کے قابل ہو گئے ہیں۔‘

اس بیان کے ساتھ اس ماہ کے شروع میں بکنگھم پیلس کے باغات میں لی گئی بادشاہ اور ملکہ کیملا کی تصویر بھی جاری کی گئی ہے۔

یہ غیر یقینی ہے کہ آیا بادشاہ اس سال ہونے والی چند بڑی تقریبات میں شرکت کر سکیں گے جیسا کہ ’ٹروپنگ دی کلر‘، ڈی- ڈے کی یادگاریں، ’سمر گارڈن پارٹیاں‘، ’رائل سکوٹ‘ اور خزاں میں بیرون ملک سفر وغیرہ۔

پیلس کا کہنا ہے کہ عین وقت پر طبی مشورے کے مطابق فیصلے کیے جائیں گے۔

فروری سے کینسر کی تشخیص کے بعد سے بادشاہ چارلس عوامی مصروفیات سے دور ہیں۔

بادشاہ اب ملکہ کیملا کے ساتھ اگلے ہفتے کینسر کے علاج کے مرکز کا دورہ کریں گے، وہ مریضوں اور عملے سے ملاقات کریں گے اور کینسر کی تحقیق کے لیے اپنا تعاون ظاہر کریں گے۔

اگرچہ وہ سربراہ مملکت کی حیثیت سے اپنے نجی کام انجام دیتے رہے ہیں، جس میں وزیراعظم سے باقاعدہ ملاقاتیں بھی شامل ہیں لیکن یہ دورہ اس سال ان کی پہلی سرکاری عوامی مصروفیت ہو گی۔

ونڈسر میں ایسٹر سنڈے کی ایک چرچ سروس میں بادشاہ نے خیر خواہوں کو سلام کرکے اور لوگوں سے ہاتھ ملا کر ہجوم کو حیران کردیا۔