بگ بیش لیگ میں قومی ٹیم کے فاسٹ بولر حارث رؤف نے تین وکٹیں لے لیں۔
بگ بیش لیگ کے 14ویں میچ میں میلبرن اسٹارز نے سڈنی سکسرز کو 4 وکٹوں سے شکست دے دی، سڈنی سکسرز نے پہلے بیٹنگ کرتے ہوئے مقررہ اوورز میں 8 وکٹوں کے نقصان پر 154 رنز بنائے۔
میلبرن اسٹار نے مطلوبہ ہدف 19.3 اوورز میں 6 وکٹوں کے نقصان پر حاصل کرلیا۔
سڈنی سکسرز کے جیمز ونس کی 83 رنز کی دھواں دار اننگز بھی سکسرز کو کامیابی نہ دلوا سکی۔
میلبرن اسٹارز کی نمائندگی کرنے والے قومی فاسٹ بولر حارث رؤف اور لیگ اسپنر اسامہ میر نے شاندار کارکردگی کا مظاہرہ کیا۔
حارث رؤف نے چار اوورز میں 38 رنز دے کر تین کھلاڑیوں کو پویلین کی راہ دکھائی۔
اسامہ میر نے بھی چار اوورز میں 19 رنز کے عوض تین وکٹیں حاصل کیں، ہلٹن کارٹ رائٹ کو 47 رنز کی ناقابل شکست اننگز کھیلنے پر میچ کا بہترین کھلاڑی قرار دیا گیا
