ویب ڈیسک: پاکستان اور بھارت کے درمیان پہلگام واقعے کے بعد بڑھتی ہوئی کشیدگی پر ترکیہ کے صدر رجب طیب اردوان کا ردعمل سامنے آگیا ہے۔
ترک خبر رساں ایجنسی کے مطابق صدر اردوان نے دونوں ممالک پر زور دیا ہے کہ وہ تنازع کو بڑھنے سے روکنے کے لیے فوری اقدامات کریں۔
ترک کابینہ کے اجلاس کے بعد میڈیا سے گفتگو کرتے ہوئے صدر اردوان نے کہا کہ وزیر اعظم شہباز شریف کا ترکیہ کا حالیہ دورہ ایک انتہائی حساس وقت میں ہوا ہے۔ انہوں نے بتایا کہ اس ملاقات کے دوران دونوں ممالک نے خصوصی طور پر تجارت اور دفاعی صنعت میں تعاون کو فروغ دینے پر تبادلہ خیال کیا اور ترکیہ نے پاکستانی عوام کے لیے اپنی بھرپور حمایت کا اعادہ کیا۔
صدر اردوان نے مزید کہا کہ ترکیہ چاہتا ہے کہ پاکستان اور بھارت کے درمیان بڑھتی ہوئی کشیدگی میں جلد از جلد کمی آئے، اس سے پہلے کہ صورتحال مزید سنگین ہو۔ انہوں نے واضح کیا کہ ترکیہ کا ہمیشہ سے اصولی مؤقف رہا ہے کہ وہ اپنے خطے اور دنیا بھر میں نئے تنازعات سے گریز کا حامی ہے۔
Source link
