(ویب ڈیسک ) سندھ پولیس نے صوبے بھر میں کرایہ داروں کا ریکارڈ محفوظ کرنے کے لیے ایک آن لائن ایپلی کیشن متعارف کرا دی ہے۔ سندھ پولیس کے مختلف محکموں میں ڈیجیٹلائزیشن کا عمل تیزی سے جاری ہے۔
یہ نیا نظام “Tenant Registration For Urban Security & Tracking” کے نام سے سندھ پولیس کی سرکاری ویب سائٹ پر دستیاب ہے، جس کے ذریعے پراپرٹی مالکان آسانی سے کرایہ داروں کی معلومات آن لائن رجسٹر کر سکتے ہیں۔
رینٹ ایکٹ کے تحت مکان مالکان پر لازم ہے کہ وہ کرایہ داروں کی معلومات متعلقہ پولیس اسٹیشن کو فراہم کریں۔ اس سے قبل اس عمل کے لیے پولیس اسٹیشن کے چکر لگانا پڑتے تھے، تاہم اب یہ قانونی رجسٹریشن گھر بیٹھے آن لائن مکمل کی جا سکتی ہے۔
سندھ پولیس کے اس اقدام کے تحت رہائشی ایکٹ کے مطابق آن لائن رجسٹریشن ممکن ہو گئی ہے، جس سے حکام کو کرایہ داروں کا مستند اور تصدیق شدہ ریکارڈ برقرار رکھنے میں مدد ملے گی۔ شہری اس سہولت کے ذریعے وقت کی بچت کر سکتے ہیں اور پولیس اسٹیشن جانے کی ضرورت سے بچ سکتے ہیں۔
یہ آن لائن نظام کرایہ داروں کے مستند ریکارڈ کی فراہمی کو یقینی بناتا ہے اور سندھ پولیس کی انتظامی امور کو ڈیجیٹل بنانے کی وسیع تر کوششوں کا حصہ ہے۔
حکام نے شہریوں سے اپیل کی ہے کہ وہ قانونی تقاضوں کی تکمیل کے لیے اس پلیٹ فارم کے ذریعے اپنے کرایہ داروں کی رجسٹریشن کرائیں۔
