مشیر خزانہ خیبرپختونخوا مزمل اسلم نے کہا ہے کہ قومی اقتصادی کونسل ضم اضلاع کیلئے 70 ارب کی ترقیاتی گرانٹ جاری کرے گی۔
مزمل اسلم نے ایک بیان میں کہا ہے کہ قومی اقتصادی کونسل اجلاس میں وزیراعلیٰ علی امین گنڈا پور اور میں نے شرکت کی، جس میں قومی اقتصادی کونسل نے ہمارے مطالبے سے اتفاق کیا، قومی اقتصادی کونسل ضم اضلاع کیلئے 70 ارب کی ترقیاتی گرانٹ جاری کرے گی۔
مشیر خزانہ کے مطابق قومی اقتصادی کونسل سے ٹرانسمیشن لائن کیلئے فنڈز فراہمی کا مطالبہ بھی کیا گیا، انھیں بتایا کہ صوبہ رواں سال صرف 7 روپے فی یونٹ کے حساب سے 180 میگاواٹ بجلی کی پیداور کیلئے تیار ہے، صوبائی حکومت یہی سستی بجلی رشکئی اور درابن اکنامک زونز کو فراہم کرنا چاہتی ہے۔
مزمل اسلم نے بتایا کہ چونکہ قومی مالیاتی معاہدوں میں تمام اسٹیک ہولڈرز کو اعتماد میں لینا ضروری ہے اس لئے آئی ایم ایف کے مذاکرات میں صوبوں کو شامل کیا جائے۔ چیئرمین قومی اقتصادی کونسل اور تمام حکام نے صوبوں کی آئی ایم ایف مذاکرات میں شمولیت پر اتفاق کیا۔
