نیویارک : اقوام متحدہ میں پاکستان کے مستقل مندوب عاصم افتخار نے سلامتی کونسل کے ہنگامی اجلاس میں ایران پر ہونے والے حملوں کی شدید مذمت کی ہے۔ مشرق وسطیٰ کی صورتحال پر بات کرتے ہوئے عاصم افتخار نے کہا کہ موجودہ حالات پر پاکستان کو گہری تشویش ہے۔
انہوں نے مزید کہا کہ ایران پر حملہ اس وقت کیا گیا جب سفارتی کوششیں جاری تھیں، اور اس موقع پر فریقین سے صبر و تحمل کا مظاہرہ کرنے کی اپیل کی۔ عاصم افتخار نے اس بات کا بھی اظہار کیا کہ پاکستان سعودی عرب، متحدہ عرب امارات، بحرین اور قطر پر ہونے والے حملوں کی بھی مذمت کرتا ہے اور عالمی قوانین کی پاسداری کا ہر صورت میں احترام کرنا چاہیے۔
پاکستانی مندوب نے یو اے ای میں ایک پاکستانی شہری کی ہلاکت پر افسوس کا اظہار کرتے ہوئے اس کی بھی مذمت کی۔ عاصم افتخار نے کہا کہ پاکستان ایران پر ہونے والے حملوں کی مذمت کرتا ہے اور اقوام متحدہ کے چارٹر کی اہمیت پر زور دیا۔ انہوں نے عمان کے ذریعے امریکا اور ایران کے درمیان مذاکرات کی ثالثی کی کوششوں کو بھی سراہا، اور کہا کہ یہ اقدام خطے میں امن کی راہ ہموار کرنے کے لیے اہم ہے۔
