لاہور : پنجاب اسمبلی میں اپوزیشن رکن شیخ امتیاز محمود نے ڈرائیونگ لائسنس کے اجرا کے لیے عمر کی حد 18 سال کے بجائے 16 سال کرنے کے حوالے سے ایک قرارداد جمع کرادی ہے۔
قرارداد میں کہا گیا ہے کہ پاکستان اور خصوصاً پنجاب میں نوجوانوں کی تعداد میں تیزی سے اضافہ ہو رہا ہے، اور انہیں معیشت میں شامل کرنے کے لیے ضروری ہے کہ ڈرائیونگ کی عمر 18 سال کے بجائے 16 سال کی جائے۔
شیخ امتیاز محمود کی جانب سے جمع کرائی گئی قرارداد میں مزید کہا گیا ہے کہ کینیڈا کے بیشتر صوبوں میں 16 سال کی عمر میں ڈرائیونگ کی اجازت دی جاتی ہے، جبکہ جرمنی میں 17 سال کی عمر میں ڈرائیونگ لائسنس حاصل کیا جا سکتا ہے۔
قرارداد میں مطالبہ کیا گیا ہے کہ پاکستان میں بھی نوجوانوں کو ملکی ترقی کے عمل میں شامل کرنے کے لیے ڈرائیونگ کی عمر کو 18 سال سے کم کر کے 16 سال کیا جائے۔
یہ قرارداد ملک میں نوجوانوں کے لیے نئے مواقع فراہم کرنے اور ان کی معاشی ترقی میں کردار کو اہمیت دینے کے لیے پیش کی گئی ہے۔
