ویب ڈیسک: پنجاب بھر میں موسم کی شدت کے ساتھ بارش برسانے والا نیا موسمیاتی سسٹم داخل ہو گیا ہے، جس کے بعد صوبے کے مختلف علاقوں میں بارش اور برفباری کی پیش گوئی سامنے آ گئی ہے۔
محکمہ موسمیات کے مطابق صوبائی دارالحکومت لاہور سمیت پنجاب کے بیشتر علاقوں میں بارش کا سسٹم داخل ہو چکا ہے، تاہم سسٹم کمزور ہونے کے باعث آج موسم ابر آلود رہنے کے ساتھ دھند اور فوگ چھائے رہنے کا امکان ہے۔
موسمیاتی ماہرین کا کہنا ہے کہ کل لاہور سمیت صوبے کے مختلف اضلاع میں ہلکی بارش متوقع ہے۔ بارشوں کے نتیجے میں خشک موسم کے باعث پھیلنے والی بیماریوں جیسے نزلہ، زکام، کھانسی اور بخار سے شہریوں کو ریلیف ملنے کا امکان ہے۔
پی ڈی ایم اے پنجاب کے مطابق صوبے کے پہاڑی علاقوں میں گرج چمک کے ساتھ بارش اور برفباری کی پیش گوئی کی گئی ہے۔ راولپنڈی، مری، گلیات اور پوٹھوہار ریجن میں بارش اور برفباری کا امکان ہے، جبکہ 20 اور 21 دسمبر کے دوران لاہور، شیخوپورہ، سرگودھا، خوشاب، فیصل آباد، حافظ آباد، گجرانوالہ، منڈی بہاالدین، گجرات، سیالکوٹ، جھنگ اور ٹوبہ ٹیک سنگھ میں بھی ہلکی بارش متوقع ہے۔
ڈی جی پی ڈی ایم اے عرفان علی کاٹھیا کے مطابق بارشوں سے دھند اور اسموگ کی صورتحال میں کمی آنے کا امکان ہے۔ انہوں نے شہریوں کو اسموگ سے بچاؤ کے لیے ماسک کے استعمال اور غیر ضروری باہر نکلنے سے گریز کرنے کی ہدایت کی ہے۔
ڈی جی پی ڈی ایم اے نے بتایا کہ پی ڈی ایم اے کنٹرول روم میں صورتحال کی 24 گھنٹے مانیٹرنگ جاری ہے، مری میں سیاحوں کے لیے سہولت مراکز قائم کر دیے گئے ہیں جبکہ کسی بھی ہنگامی صورتحال میں 1129 پر رابطہ کیا جا سکتا ہے۔
