اسلام آباد: وزیراعظم کی ہدایت پر وفاقی وزیر پٹرولیم علی پرویز ملک کی زیر صدارت گیس سپلائی کی صورتحال پر ایک اجلاس منعقد کیا گیا، جس میں گیس کی فراہمی میں گذشتہ سال کے مقابلے میں بہتری کی رپورٹس پیش کی گئیں۔ سوئی کمپنیوں نے وزیرِ پٹرولیم کو گیس سپلائی سے متعلق تفصیلی ڈیٹا فراہم کیا۔
علی پرویز ملک نے اجلاس کے دوران بتایا کہ اس سال گھریلو صارفین کو گیس کی فراہمی میں 26 فیصد اضافہ ہوا ہے، اور عوام کو سردیوں کے دوران مشکلات سے بچانے کے لیے ضروری اقدامات کیے گئے ہیں۔ انہوں نے کہا کہ گیس کی فراہمی میں پچھلے سال کی نسبت واضح بہتری آئی ہے، جس کے باعث صارفین کی جانب سے مثبت فیڈ بیک میں اضافہ ہوا ہے۔
وفاقی وزیر پٹرولیم نے سوئی کمپنیوں کو ہدایت کی کہ وہ کھانے کے اوقات میں گیس پریشر کو یقینی بنائیں تاکہ صارفین کو کسی بھی قسم کی پریشانی کا سامنا نہ ہو۔
ایم ڈی سوئی سدرن گیس نے اجلاس میں بتایا کہ کوئٹہ میں گیس کی فراہمی کے دورانیے میں مزید دو گھنٹے کا اضافہ کر دیا گیا ہے۔ علی پرویز ملک نے اس بات کا خیرمقدم کرتے ہوئے کہا کہ سوئی نادرن اور سوئی سدرن گیس کمپنیوں کے شکایات کے حل میں بہتری آئی ہے اور ہر شکایت کو فوراً حل کرنا کمپنیوں کی اولین ترجیح ہونی چاہیے۔
انہوں نے مزید ہدایت کی کہ کم پریشر کی شکایات کو ترجیحی بنیادوں پر حل کیا جائے تاکہ عوام کو زیادہ سے زیادہ ریلیف فراہم کیا جا سکے۔
ایم ڈی سوئی کمپنیوں نے اجلاس میں بتایا کہ 1199 ہیلپ لائن اور شکایات کے نظام کو مکمل طور پر فعال کر دیا گیا ہے، اور شکایات کے فوری ازالے کے لیے خصوصی مانیٹرنگ کی جا رہی ہے۔ کمپنیوں نے کنٹرول رومز قائم کر کے شکایات کے ازالے کے عمل کو مزید بہتر بنایا ہے۔
