پاکستان کے سابق ٹیسٹ کرکٹر عبد الرحمان کو لاہور میں انکی رہائشگاہ کے باہر ڈاکوؤں نے لوٹ لیا۔
یہ واقعہ لاہور کے علاقے جوہر ٹاؤن میں پیش آیا جب سابق کرکٹر عبد الرحمان اپنے گھر واپس آرہے تھے۔ ڈاکو گھر کے باہر ہی اسلحہ دکھا کر ان سے ایک ہزار ڈالر لوٹ کر فرار ہوگئے۔
اس حوالے سے عبد الرحمان نے بتایا کہ ‘واقعہ شام مغرب کے بعد جوہر ٹاؤن میں گھر واپس آتے ہوئے پیش آیا جب میری گاڑی کو موٹر سائیکل سوار ڈاکوؤں نے گھیر لیا. واقعے کے وقت میری بیٹی اور اہلیہ بھی ساتھ موجود تھے۔
سابق کرکٹر نے مزید کہا کہ ‘ڈاکوؤں نے میری بیٹی پر گن تان لی تھی، ملزموں نے موبائل فون نہیں چھینا تاہم پرس اور جیولری لے کر فرار ہوگئے۔’
خیال رہے کہ عبد الرحمان پاکستان کی جانب سے 22 ٹیسٹ میچز میں 99 وکٹیں لینے میں کامیاب ہوئے۔ سابق ٹیسٹ کرکٹر نے اپنا آخری میچ سری لنکا کے خلاف 2014 میں کھیلا تھا۔
