کراچی: سابق ٹیسٹ کپتان اور کرکٹر جاوید میانداد نے کہا ہے کہ پوری دنیا کی کرکٹ میں ایسا نہیں ہوتا جیسا پاکستان میں ہوتا ہے۔
سابق ٹیسٹ کپتان جاوید میانداد نے میڈیا سے گفتگو کرتے ہوئے کہا کہ پاکستان میں جس کی حکومت ہوتی ہے وہی پاکستان کرکٹ بورڈ (پی سی بی) میں اپنے پسندیدہ بندے لے کر آتا ہے۔
انہوں نے کہا کہ ملک میں جو بھی وزیر اعظم بنے اسے ملک اور کرکٹ کی ترقی کے لیے کام کرنا چاہیے۔
جاوید میانداد نے کہا کہ پوری دنیا کی کرکٹ میں ایسا نہیں ہوتا جیسا پاکستان میں ہوتا ہے لیکن سب کو کرکٹ کے فروغ کے لیے کام کرنا ہو گا۔
انہوں نے کہا کہ اگر مجھے پی سی بی کا اختیار مل جائے تو میں سب ٹھیک کر دوں گا جبکہ میں نے ماضی میں پاکستان کرکٹ ٹیم کی کوچنگ بھی کی ہے اور اُن کو کرکٹر بنا دیا تھا جن کو کچھ معلوم ہی نہیں تھا۔
واضح رہے کہ نگراں وزیر اعلیٰ پنجاب محسن نقوی کو پی سی بی مینجمنٹ کمیٹی کا سربراہ مقرر کر دیا گیا ہے۔
