(ویب ڈیسک) ایچ بی ایل پاکستان سپرلیگ ( پی ایس ایل ) نے لندن روڈ شو کروانے کا فیصلہ کیا ہے۔
پاکستان کرکٹ بورڈ(پی سی بی ) کا کہنا ہے کہ ایچ بی ایل پی ایس ایل کا روڈ شو لندن کی لارڈز کرکٹ گراؤنڈ میں ہوگا،عالمی سرمایہ کار، کمرشل پارٹنرز اور شائقین کی شرکت متوقع ہے۔
پی سی بی کے مطابق ایچ بی ایل پی ایس ایل دنیا کی تیزی سے بڑھتی ہوئی T20 لیگز میں شامل ہیں۔ایچ بی ایل پی ایس ایل کی دو نئی ٹیموں بیچنے کی تیاریاں تیز ہو گئیں۔
پی سی بی کا کہنا ہے کہ نئی ٹیموں میں برطانوی سرمایہ کاروں نے گہری دلچسپی کا اظہار کیا ہے۔ لندن روڈ شو کا مقصد لیگ کا وژن، کمرشل ماڈل اور مستقبل کی حکمتِ عملی کی ترویج ہے۔
چیئرمین پاکستان کرکٹ بورڈ محسن نقوی کا کہنا ہے کہ لارڈز میں روڈ شو پاکستان کرکٹ کی عالمی شناخت کا ثبوت ہے، لندن کا روڈ شو پی ایس ایل کی بین الاقوامی اپیل کو مزید فروغ دے گا۔
سی ای او پاکستان سپر لیگ سلمان نصیر نے کہا ہے کہ پاکستانی لیگ عالمی فالوونگ اور مضبوط کمرشل ویلیو رکھتی ہے،دو نئی ٹیموں کے اضافے سے سرمایہ کاروں کے لیے بڑے مواقع پیدا ہوں گے۔
پی ایس ایل روڈ شو میں کاروباری شخصیات، ممکنہ فرنچائز مالکان اور شائقین کی بڑی تعداد شریک ہوگی۔
پاکستانی لیگ کی عالمی توسیع اور سٹریٹجک پارٹنرشپس کو مزید فروغ دینے کا اعلان کیا گیا۔30سپر فینز کو خصوصی ایونٹ میں شرکت کا موقع دیا جائے گا۔
