حماس اور اسرائیل کے درمیان قیدیوں کا تبادلہ جاری، اب تک کتنے یرغمالی اور فلسطینی رہا کیے گئے ہیں؟

خیال رہے کہ اکتوبر میں حماس نے دو امریکی اور دو اسرائیلی یرغمالیوں کو رہا کیا تھا۔ ایک اسرائیلی فوجی جو غزہ میں لڑتے ہوئے قید کر دیے گئے تھے کو بھی حماس نے رہا کر دیا تھا۔

حماس نے کا کہنا ہے کہ وہ جنگ بندی کے اس دورانیے میں اضافہ دیکھنا چاہتے ہیں تا کہ مزید یرغمال شہریوں کی بھی رہائی عمل میں لائی جا سکے۔ موجودہ جنگ بندی کے معاہدے کا آخری دن پیر بنتا ہے۔

امریکی صدر جو بائیڈن نے بھی اپنے ایک بیان میں اس امید کا اظہار کیا ہے کہ حماس کی قید میں مزید امریکی شہریوں کو بھی جلد رہا کیا جائے گا۔ انھوں نے کہا کہ وہ چاہتے ہیں کہ حماس کی قید سے تمام یرغمال بنائے گئے شہری آزاد ہو جائیں اور غزہ کے کسی کونے پر بھی حماس کی حکومت قائم نہ رہے۔

واضح رہے کہ قطر نے اسرائیل اور حماس کے درمیان معاہدے میں ثالثی کی ہے۔ اسرائیل اور حماس کے درمیان جنگ میں چار روزہ وقفے کے دوران یرغمالیوں کے تبادلے کا آغاز کیا گیا تھا۔

جمعے کی صبح سے شروع ہونے والے اس عارضی جنگ بندی کے دوران حماس کے پاس موجود 50 اسرائیلی یرغمالیوں اور اسرائیل کی جیلوں میں قید 150 فلسطینیوں کی رہائی کے علاوہ غزہ میں امداد کی فراہمی پر اتفاق کیا گیا تھا۔

اسرائیل نے حماس کو مزید یرغمالیوں کی رہائی کی ترغیب دیتے ہوئے جنگ بندی کی مدت میں اضافے کی پیشکش بھی کی ہے۔

یہ سات اکتوبر سے شروع ہونے والی لڑائی میں پہلا وقفہ ہے تاہم اسرائیل نے واضح کیا ہے کہ یہ وقفہ جنگ کا خاتمہ نہیں۔

اسرائیلی فوج کے ترجمان نے جمعے کی صبح ایک بیان میں کہا ہے کہ ’انسانی ہمدردری کے تحت یہ وقفہ عارضی ہے‘۔

انھوں نے غزہ کے شہریوں کو مخاطب کر کے کہا کہہ ’شمالی غزہ ایک خطرناک علاقہ ہے اور شمال کی جانب سفر کرنے کی اجازت نہیں ہے۔ اپنے تحفظ کے لیے جنوب میں ہی رہیں۔‘