اسلام آباد ہائیکورٹ کے ججز کو دھمکی آمیز خطوط موصول ہونے کے معاملے پر پاکستان تحریک انصاف (پی ٹی آئی) نے فوری تحقیقات اور فل کورٹ اجلاس بلانے کا مطالبہ کر دیا۔
پی ٹی آئی ترجمان کی جانب سے جاری کردہ بیان میں کہا گیا ہے کہ بادی النظر میں مہلک اور زہریلے مواد پر مشتمل خطوط کا واضح مقصد ہائیکورٹ کے ججز کو دھمکانا اور انہیں سپریم جوڈیشل کونسل کو بھجوائے گئے خط سے دستبردار کروانا ہے۔
انہوں نے کہا کہ ان خطوط کی ترسیل کے بعد عدلیہ میں مداخلت کے معاملے کی فیصلہ کن تحقیقات اور کارروائی کی ضرورت کئی گنا بڑھ گئی ہے۔
ترجمان پی ٹی آئی نے کہا کہ اسلام آباد ہائیکورٹ کے خط تحریر کرنے والے 6 ججز اور ان کے اہلخانہ کی سلامتی کے لیے خصوصی اقدامات اٹھائے جائیں۔
انہوں نے کہا کہ مداخلت اور بدمعاشی کے مؤثر تدارک اور عدلیہ کو ایسے خطرات سے محفوظ بنانے کے لیے چیف جسٹس پاکستان معاملے کو بلاتاخیر فل کورٹ کے سپرد کریں اور کھلی کارروائی کے ذریعے اسے منطقی انجام تک پہنچایا جائے۔
