شارٹ ویڈیو ایپلی کیشن ٹک ٹاک نے اسٹریمنگ ویب سائٹ یوٹیوب کو ٹکر دینے کے لیے ڈیسک ٹاپ ورژن میں متعدد فیچرز پیش کردیے۔
ٹک ٹاک کی جانب سے جاری بیان کے مطابق ڈیسک ٹاپ ورژن کو زیادہ بہتر بنانے کے لیے متعدد فیچرز کو پیش کردیا گیا، ترتیب وار صارفین کو ان تک رسائی دی جائے گی۔
اب ڈیسک ٹاپ ورژن میں بھی ایکسپلور کا ٹیب شامل ہوگا جب کہ فار یو ٹیب کو بھی مزید بہتر کردیا گیا۔
اسی طرح ٹک ٹاک کے ڈیسک ٹاپ ورژن میں گیم کی لائیو اسٹریم بھی دیکھ سکیں گے جو کہ یوٹیوب پر مقبول ترین فیچر ہے۔
ٹک ٹاک ڈیسک ٹاپ ورژن کو بھی موبائل ایپ ورژن کی طرح آسان اور سادہ بنادیا گیا تاکہ زیادہ سے زیادہ صارفین کمپیوٹر پر بھی شیئرنگ ایپلی کیشن کو استعمال کر سکیں۔
ٹک ٹاک کی جانب سے ڈیسک ٹاپ ورژن کی لے آؤٹ بھی تبدیل کرکے بہتر کردیا گیا اور تمام صارفین کو پیش کیے گئے فیچرز تک ترتیب وار رسائی دے دی جائے گی۔
اب جہاں ٹک ٹاک نے ڈیسک ٹاپ ورژن کو یوٹیوب جیسا بنانے کی جانب قدم بڑھایا ہے، وہیں ٹک ٹاک پر 60 منٹ طویل ویڈیو اپ لوڈ کرنے کے فیچر کی بھی آزمائش جاری ہے۔
ابتدائی طور پر ٹک ٹاک پر صرف ایک منٹ دورانیے کی ویڈیوز اپ لوڈ کرنے کی اجازت ہوتی تھی لیکن بعد ازاں اس دورانیے کو بڑھا دیا گیا تھا اور اب ممکنہ طور پر جلد ہی تمام صارفین کو طویل ویڈیوز یعنی 60 منٹ دورانیے کی ویڈیوز بھی اپ لوڈ کرنے تک رسائی دیے جانے کا امکان ہے۔
