ویب ڈیسک: سوشل میڈیا پر گردش کرنے والے ایک نوٹیفکیشن میں دعویٰ کیا جا رہا ہے کہ پنجاب حکومت نے شدید موسمی حالات کے باعث صوبے بھر کے تمام سرکاری اور نجی اسکولوں میں موسمِ سرما کی تعطیلات میں توسیع کر دی ہے۔
گردش کرنے والی دستاویز کے مطابق اسکولوں کی تعطیلات 10 جنوری سے بڑھا کر 17 جنوری 2026 تک کر دی گئی ہیں، جبکہ اسکول 19 جنوری سے دوبارہ کھلیں گے۔ اس نوٹیفکیشن میں ضلعی تعلیمی حکام کو سختی سے عملدرآمد یقینی بنانے کی ہدایات بھی درج ہیں۔
تاہم تاحال پنجاب حکومت کی جانب سے تعطیلات میں توسیع کی کوئی سرکاری تصدیق سامنے نہیں آئی۔ نہ ہی اسکول ایجوکیشن ڈیپارٹمنٹ یا پنجاب حکومت کے کسی سرکاری پلیٹ فارم پر ایسا کوئی نوٹیفکیشن جاری کیا گیا ہے جو سوشل میڈیا پر گردش کرنے والے دعوے کی تصدیق کرتا ہو۔
پنجاب میں تعلیمی معاملات سے متعلق فیصلوں کا باضابطہ اعلان سرکاری نوٹیفکیشنز اور صوبائی تعلیمی قیادت کے عوامی بیانات کے ذریعے کیا جاتا ہے۔
حالیہ دنوں میں وزیر تعلیم پنجاب رانا سکندر حیات نے موسمِ سرما کی تعطیلات سے متعلق افواہوں پر وضاحت دیتے ہوئے تعطیلات میں کسی بھی توسیع کی تردید کی تھی۔
ہفتے کے آغاز میں جاری اپنے عوامی بیان میں وزیر تعلیم نے واضح کیا تھا کہ اسکول اور کالجز مقررہ شیڈول کے مطابق کھلیں گے اور عوام کو غیر مصدقہ اطلاعات پر یقین نہ کرنے کی ہدایت کی تھی۔ ان کا کہنا تھا کہ “اسکول اور کالجز کی تعطیلات میں کوئی توسیع نہیں کی جا رہی، براہِ کرم فیک نیوز سے گریز کریں۔”
School & College Holidays Will NOT Be Extended.
Pls Avoid Fake News— Rana Sikandar Hayat (@RanaSikandarH) January 4, 2026
تاحال موسمِ سرما کی تعطیلات کے شیڈول میں کسی قسم کی تبدیلی کا اعلان نہیں کیا گیا ہے، اور والدین، طلبہ اور اسکول انتظامیہ کو ہدایت کی گئی ہے کہ درست معلومات کے لیے صرف سرکاری حکومتی ذرائع پر ہی انحصار کریں۔
