چیئرمین پی سی بی محسن نقوی کی تعیناتی اسلام آباد ہائیکورٹ میں چیلنج

اسلام آباد ہائیکورٹ میں محسن نقوی کی بطور چیئرمین پی سی بی تعیناتی چیلنج کی گئی۔ چیف جسٹس اسلام آباد ہائیکورٹ عامر فاروق نے درخواست قابلِ سماعت ہونے پر فیصلہ محفوظ کرلیا۔

چیف جسٹس نے درخواست گزار کے وکیل سے استفسار کیا کہ آپ کیوں کہہ رہے ہیں کہ تعیناتی غلط ہوئی ہے؟ درخواست گزار کے وکیل نے کہا کہ آئین کے مطابق منتخب اور نگراں وزیرِاعظم میں فرق ہے۔

وکیل کا دلائل دیتے ہوئے کہنا تھا کہ نگراں وزیراعظم پاکستان کرکٹ بورڈ کا پیٹرن نہیں ہوسکتا۔ چیئرمین پی سی بی کی تعیناتی کا اختیار بطور پیٹرن وزیرِ اعظم کے پاس ہے۔

چیف جسٹس عامر فاروق نے کہا کہ تو آپ کہہ رہے ہیں کہ نگراں وزیراعظم کے پاس یہ اختیار نہیں تھا۔ بعد ازاں آرڈر لکھواتے وقت درخواست گزار کے وکیل کے بولنے پر چیف جسٹس برہم ہوگئے اور کہا کہ آرڈر لکھوانے کے دوران بول رہے ہیں تو میں نہیں لکھواتا۔