ویب ڈیسک: امریکا نے بھارت اور پاکستان پر زور دیا ہے کہ وہ پہلگام واقعے کے بعد پیدا ہونے والی کشیدگی کو مزید نہ بڑھائیں اور معاملے کو تحمل سے حل کریں۔
امریکی محکمہ خارجہ کی ترجمان ٹیمی بروس نے اپنی پریس بریفنگ میں بتایا کہ واشنگٹن اسلام آباد اور نئی دہلی، دونوں سے رابطے میں ہے اور فریقین کو کشیدہ صورتحال سے گریز کی ہدایت کی جا رہی ہے۔
ترجمان کے مطابق امریکی وزیر خارجہ مارکو روبیو آئندہ 24 گھنٹوں میں پاکستان اور بھارت کے وزرائے خارجہ سے رابطہ کریں گے تاکہ معاملے کو سفارتی ذرائع سے سلجھایا جا سکے۔ انہوں نے مزید کہا کہ دیگر عالمی رہنما اور وزرائے خارجہ کو بھی اس مسئلے پر دونوں ممالک سے بات چیت کرنے کی ترغیب دی جا رہی ہے۔
ٹیمی بروس نے کہا کہ امریکا اس معاملے پر مسلسل نظر رکھے ہوئے ہے اور روزانہ کی بنیاد پر اقدامات کیے جا رہے ہیں۔ انہوں نے کہا کہ دونوں ممالک میں امریکی ہم منصبوں کے ساتھ مختلف سطحوں پر براہ راست رابطے جاری ہیں، اور ان کوششوں کا مثبت اثر سامنے آنے کی امید ہے۔
ترجمان کا کہنا تھا کہ صدر ٹرمپ کی قیادت میں امریکا اس خطے میں امن و استحکام کے لیے متحرک کردار ادا کر رہا ہے۔ ان کا کہنا تھا کہ موجودہ وقت میں سب سے اہم پہلو وزیر خارجہ مارکو روبیو کی سفارتی کوششوں کا نتیجہ ہے، جس کا اثر جلد نظر آنا چاہیے۔
یاد رہے کہ مقبوضہ کشمیر کے علاقے پہلگام میں پیش آنے والے واقعے میں 26 بھارتی سیاح ہلاک ہوئے تھے، جس کے بعد بھارت اور پاکستان کے درمیان کشیدگی میں واضح اضافہ دیکھنے میں آیا ہے۔ بھارت کی جانب سے سندھ طاس معاہدے کی معطلی سمیت دیگر اقدامات پر پاکستان نے بھی بھرپور ردعمل دیا ہے۔
Source link
