دبئی: جیٹکس 2025 ایکسپو کا آغاز دبئی میں ہو گیا، جس میں پاکستانی پویلین کا افتتاح پروفیسر ڈاکٹر چوہدری عبدالرحمان نے کیا۔ اس ایکسپو میں تعلیم کے شعبے سے متعلق عالمی سطح پر اہم بات چیت ہو رہی ہے، اور اس میں پاکستان کا 35 رکنی وفد بھی شرکت کر رہا ہے۔
وفد کی قیادت پروفیسر ڈاکٹر چوہدری عبدالرحمان کر رہے ہیں، اور اس میں چاروں صوبوں کے نمائندے، وائس چانسلرز، ڈائریکٹرز اور نجی یونیورسٹیز کے صدور شامل ہیں۔ پاکستانی پویلین میں ملک کی 12 معروف یونیورسٹیز حصہ لے رہی ہیں، جن میں سپیریئر یونیورسٹی لاہور، پشاور سٹی یونیورسٹی، پشاور گندھارا یونیورسٹی، گوجرانوالہ گفٹ یونیورسٹی، پریسٹن یونیورسٹی اسلام آباد اور دیگر یونیورسٹیز شامل ہیں۔
پروفیسر ڈاکٹر چوہدری عبدالرحمان نے کہا کہ ہم پاکستان کی تعلیمی طاقت کو دنیا بھر میں اجاگر کرنا چاہتے ہیں اور اپنے تعلیمی معیار کو فخر کے ساتھ دنیا کے سامنے پیش کریں گے۔ پاکستانی پویلین کا مقصد نہ صرف پاکستان کے تعلیمی معیار کو فروغ دینا ہے بلکہ نئی تعلیمی شراکت داریوں کی تشکیل اور موجودہ تعلقات کو مزید مستحکم کرنا ہے۔
اس کے علاوہ، اس نمائش کا ایک اور مقصد یو اے ای میں مقیم پاکستانی کمیونٹی کو پاکستانی اعلیٰ تعلیم کے مواقع تک براہ راست رسائی فراہم کرنا اور تعلیم و طب کے شعبوں میں تحقیق اور جدت کے ذریعے پاکستان کا مثبت امیج دنیا بھر میں اجاگر کرنا ہے۔
