راولپنڈی : بھارت کی جانب سے ایک بار پھر لائن آف کنٹرول (ایل او سی) پر سیز فائر معاہدے کی خلاف ورزی کی گئی ہے۔ سیکیورٹی ذرائع کے مطابق 29 اور 30 اپریل کی درمیانی شب بھارتی افواج نے کیانی اور منڈل سیکٹرز میں بلااشتعال فائرنگ کی، جس میں چھوٹے ہتھیار استعمال کیے گئے۔
سکیورٹی ذرائع کے مطابق پاک فوج نے فوری اور مؤثر جوابی کارروائی کرتے ہوئے بھارتی چیک پوسٹس کو نشانہ بنایا، جس کے نتیجے میں دشمن کے متعدد مورچوں کو نقصان پہنچا۔ خاص طور پر بھارتی “چکپترا پوسٹ” کو مکمل طور پر تباہ کر دیا گیا۔
ذرائع کے مطابق بھارت کی یہ اشتعال انگیزی اس کے جنگی جنون کی عکاسی کرتی ہے، جب کہ مقبوضہ کشمیر میں مسلمانوں کے خلاف کریک ڈاؤن بھی جاری ہے۔ اس تناظر میں بھارتی افواج نے سرحدی علاقوں کو خالی کرا لیا ہے۔
سکیورٹی ذرائع نے مزید بتایا کہ پاک فوج ملکی سالمیت کے دفاع کے لیے ہر وقت تیار ہے اور کسی بھی جارحیت کا منہ توڑ جواب دینے کی صلاحیت رکھتی ہے۔
