لاہور: وزیر اعلیٰ پنجاب مریم نواز شریف نے راوی سٹی منصوبے میں جاری ترقیاتی کاموں کی رفتار تیز کرنے کی ہدایت دی ہے۔ وزیراعلیٰ نے روڈا پیکیج 16، ایم ٹو راوی ٹول پلازا اور ریور ٹریننگ ورکس کا دورہ کیا اور منصوبے کی پیشرفت کا جائزہ لیا۔
اس موقع پر چیئرمین روڈا شاہد اشرف تارڑ، سی ای او عمران امین اور سی او او بریگیڈیئر منصور جنجوعہ نے وزیراعلیٰ کو سائٹ پر تفصیلی بریفنگ دی۔ وزیراعلیٰ نے ترقیاتی کاموں کی بروقت تکمیل پر زور دیتے ہوئے اس منصوبے کی تیز رفتاری سے تکمیل کو اہم قرار دیا۔
وزیراعلیٰ پنجاب مریم نواز شریف کا کہنا تھا کہ راوی سٹی منصوبہ لاہور کے شہریوں کے لیے ایک تاریخی قدم ثابت ہوگا، جو نہ صرف جدید رہائشی سہولتیں فراہم کرے گا بلکہ شہر کے بنیادی ڈھانچے کو بھی مضبوط کرے گا۔
انہوں نے متعلقہ حکام کو ہدایت دی کہ تمام ترقیاتی کاموں کو تیز اور معیاری طریقے سے مکمل کیا جائے تاکہ اس عظیم منصوبے کی تکمیل میں کسی قسم کی تاخیر نہ ہو۔
