راولپنڈی: چیف آف آرمی اسٹاف اور چیف آف ڈیفنس فورسز، فیلڈ مارشل سید عاصم منیر نے بھارت کو خبردار کرتے ہوئے کہا ہے کہ وہ کسی غلط فہمی یا غیر حقیقت پر نہ رہے، اگلی بار پاکستان کا ردعمل اس سے بھی تیز اور زیادہ شدت سے ہوگا۔
تینوں مسلح افواج کے افسران سے خطاب کرتے ہوئے فیلڈ مارشل نے کہا کہ ہمیں ملٹی ڈومین آپریشنز کو مزید مؤثر بنانے کی ضرورت ہے، اور اس مقصد کے لیے تینوں افواج کا مشترکہ نظام انتہائی ضروری ہے۔
فیلڈ مارشل نے ڈیفنس فورسز ہیڈکوارٹرز کے قیام کو ایک اہم تبدیلی قرار دیا۔ انہوں نے کہا کہ بڑھتے ہوئے خطرات اور بدلتی ہوئی صورتحال کے تناظر میں یہ قدم اٹھانا لازمی تھا۔ ان کا کہنا تھا کہ اس ہیڈکوارٹر کا قیام دفاعی فورسز کے لیے ایک بنیادی قدم ہے، جو تینوں افواج کے درمیان ہم آہنگی اور مشترکہ آپریشنز کو مزید مستحکم کرے گا، جبکہ ہر سروس اپنی انفرادیت کو برقرار رکھتے ہوئے اپنے آپریشنز کی تیاریوں میں اپنی خودمختاری قائم رکھے گی۔
فیلڈ مارشل سید عاصم منیر نے طالبان حکومت کو واضح پیغام دیتے ہوئے کہا کہ ان کے پاس صرف دو آپشن ہیں: یا تو وہ پاکستان کے ساتھ تعلقات میں بہتری لائیں یا خوارج کی حمایت کریں۔ انہوں نے کہا کہ پاکستان ایک امن پسند ملک ہے اور کسی کو بھی ہماری خودمختاری اور علاقائی سالمیت پر حملہ کرنے کی اجازت نہیں دی جائے گی۔
فیلڈ مارشل نے مزید کہا کہ پاکستان کی سرحدوں کی حفاظت ایمان سے سرشار جانبازوں اور یکجہتی کی حامل قوم کے پختہ عزم کی بدولت ممکن ہے۔ انہوں نے اس بات کا اعادہ کیا کہ پاکستان کسی بھی جارحیت کا جواب دینے کے لیے مکمل طور پر تیار ہے اور دشمن کے لیے ہمارا پیغام یہ ہے کہ پاکستان کی سرحدوں میں امن قائم ہے اور کسی بھی قسم کی جارحیت کو سختی سے روکا جائے گا۔
فیلڈ مارشل سید عاصم منیر نے اس عزم کا اظہار کیا کہ پاکستان کی دفاعی صلاحیت نہ صرف مضبوط ہے، بلکہ یہ دشمن کے لیے ایک واضح پیغام ہے کہ ہم اپنے ملک کی سالمیت کی حفاظت کے لیے ہر وقت تیار ہیں۔
