اسلام آباد (ڈیلی پاکستان آن لائن) نیپرا نے تمام بجلی کمپنیوں کے خلاف کارروائی کا فیصلہ کرلیا۔
اس حوالے سے نیپرا کی جانب سے جاری کردہ اعلامیے میں کہا گیا ہے کہ صارفین کی جانب سےڈسکوز بشمول کے الیکٹرک کے خلاف جولائی اور اگست 2023 کے ماہانہ بلوں میں اوور بلنگ اور غلط میٹر ریڈنگ کرنے پر نیپرا کوکثیر تعداد میں درخواستیں جمع کروائی گئی تھی، نیپرا اتھارٹی کی جانب سے اس معاملے پر سخت نوٹس لیتے ہوئے 3 سینئر افسران پر مشتمل ایک تحقیقاتی کمیٹی تشکیل دی گئی اور رپورٹ پیش کرنے کا حکم دیاگیا، کمیٹی نے صارفین کی شکایات کا جائزہ لیا اور متعلقہ ڈسکوز کے دفاتر کا وزٹ کر کے ایک جامع رپورٹ اتھارٹی کو پیش کی۔
تحقیقاتی رپورٹ کے مطابق 30دن سے زائد بلنگ کرنے کی وجہ سے لاکھوں صارفین متاثر ہوئے، بلوں پر میٹر ریڈنگ کی تصویر نہ لگانے اور فالٹی میٹر بروقت تبدیل نہ کرنے کی وجہ سے ڈسکوز کی جانب سے ایوریج بل بھیجے گئے۔ڈسٹری بیوشن کمپنیاں اپنی نا اہلی چھپانے کے لیے جان بوجھ کر اس قسم کی بددیانتی کر رہی ہیں ،ہزاروں صارفین بالخصوص گھریلو اور کم بجلی استعمال کرنے والوں کو بجلی کے غلط اور زیادہ بلوں کا سامنا کرنا پڑا، اس سے ڈسکوز کی ریکوری بھی کم رہی، ڈسکوز اتھارٹی کیجانب سے منظور شدہ ٹیرف کی شرائط و ضوابط کے مطابق بجلی کے بل وصول کرنے میں ناکام رہے ، ڈسکوز نے کنزیومر سروس مینول کی شقوں کی خلاف ورزی کرتے ہوئے لاکھوں صارفین کو غلط ڈیٹیکشن بل بھیجے۔
نیپرا اعلامیے میں مزید کہا گیا کہ اتھارٹی نے تحقیقاتی رپورٹ کی روشنی میں ڈسکوز بشمول کے الیکٹرک کے خلاف قانونی کاروائی کا فیصلہ کیا ، اتھارٹی نے ڈسکوز کو 30 دنوں میں خراب لگے ہوئے میٹروں کو جلد از جلد تبدیل کرنے اور غلط وصول کئے گئے بلوں کو صحیح کرنے کا حتمی وقت دے دیا۔
نیپرا کے مطابق اتھارٹی نے ڈسکوز کو نوٹس بھیج کر وضاحت بھی طلب کر لی،اتھارٹی نے کے الیکٹرک کو بھی ڈیفیکٹیومیٹرز پالیسی کے مطابق وقت پر تبدیل نہ کرنے پر نوٹس بھیج کر وضاحت طلب کر لی،اتھارٹی نے کمیٹی رپورٹ کو نیپرا کی ویب سائٹ پر اپلوڈ کرنے کا حکم بھی دیا ہے۔
