(ویب ڈیسک) ایران نے پیر کے روز لبنان کی جانب سے اپنے سفیر کو ملک چھوڑنے کے حکم کو مسترد کرتے ہوئے کہا ہے کہ وہ بیروت میں ہی رہیں گے۔
خیال رہے کہ لبنان نے سفیر محمد رضا شیبانی کو “ناپسندیدہ شخصیت” (persona non grata) قرار دیتے ہوئے اتوار تک ملک چھوڑنے کا حکم دیا تھا۔
ایرانی وزارت خارجہ کے ترجمان اسماعیل بقائی نے صحافیوں سے گفتگو کرتے ہوئے کہا، “ لبنان میں ہمارا سفارت خانہ فعال ہے۔ ہمارے سفیر، متعلقہ لبنانی اداروں کے بیانات اور حاصل ہونے والے نتائج کے بعد، بیروت میں اپنی ذمہ داریاں جاری رکھیں گے اور وہ اب بھی وہیں موجود ہیں۔”
لبنانی حکام نے فوری طور پر اس معاملے پر کوئی ردعمل نہیں دیا۔ یہ واضح نہیں کہ لبنان اگلا قدم کیا اٹھائے گا یا اس سے دونوں ممالک کے سفارتی تعلقات پر کیا اثر پڑے گا۔ اطلاعات کے مطابق ایرانی سفیر سفارت خانے میں موجود ہیں جہاں انہیں سفارتی استثنیٰ حاصل ہے۔
