ویب ڈیسک: شہباز شریف نے اپنے دورۂ چین کے دوران بیجنگ میں چینی صدر شی جن پنگ سے اہم ملاقات کی، جس میں دوطرفہ تعلقات، علاقائی صورتحال اور مشرقِ وسطیٰ میں جاری کشیدگی پر تفصیلی تبادلۂ خیال کیا گیا۔
ملاقات کے دوران صدر شی جن پنگ نے کہا کہ چین اور پاکستان کے درمیان تعلقات باہمی اعتماد اور دیرینہ دوستی پر مبنی ہیں، اور دونوں ممالک نے مل کر ایک “ناقابلِ شکست” شراکت داری قائم کی ہے۔
چینی صدر کا کہنا تھا کہ چین اپنی ہمسایہ سفارت کاری میں پاکستان کو خصوصی اہمیت دیتا ہے اور دونوں ممالک ہر آزمائش میں ایک دوسرے کے ساتھ کھڑے رہے ہیں۔
صدر شی جن پنگ نے وزیراعظم شہباز شریف کو “پرانا دوست” قرار دیتے ہوئے پاکستان کے ساتھ تعلقات کو مزید وسعت دینے کے عزم کا اظہار کیا۔
انہوں نے مشرقِ وسطیٰ میں امن و استحکام کے لیے پاکستان کے مثبت اور تعمیری کردار کو بھی سراہا۔
ملاقات میں دونوں رہنماؤں نے اقتصادی تعاون، علاقائی امن اور پاک۔چین اسٹریٹجک شراکت داری کو مزید مستحکم بنانے پر بھی اتفاق کیا۔
